కాకి నక్క ..

కాకి నక్క .. 

 

 

 

ఒక పెద్ద అడవిలో ఓ చింత చెట్టు ఉందంట. ఆ చెట్టుపై పొడవాటి ముక్కుతో ఒక నల్లటి కాకి ఉందంట. అయితే ఆ చెట్టు కింద, ఆ కాకికి ఒక మాంసపు ముక్క దొరికిందంట. ఆ కాకి మాంసపు ముక్కని తన పొడవాటి ముక్కుతో కరుచుకుని ఎగురుకుంటూ వెళ్ళి ఇంకో చెట్టుపై వాలింది హాయిగా తిందామని. అదే సమయానికి అక్కడే ఆడుతూ పాడుతూ ఉన్న నక్క , ఆ మాంసపు ముక్క వాసనని గమనించి, ఇంత రుచికరమైన వాసన ఎక్కడినుంచి వస్తుందబ్బా అని వెతుకుతూ ఉందంట. అప్పుడు చెట్టుపై ఉన్న కాకి నోట్లో ఉన్న మాంసపు ముక్కని చూసిందంట. అంతే, ఇంక ఆ మాంసపుముక్కని ఎలా కొట్టెయ్యాలి అని ఆలోచించి, ఒక పథకం వేసుకుందంట.

పథకం ప్రకారం, నక్క ఆ కాకి దగ్గరికెళ్ళి అన్నది కదా! "ఓ నల్ల కాకీ! నువ్వు నల్లగా నిగ నిగ మెరుస్తూ భలే అందంగా ఉన్నావు తెలుసా ? నువ్వే ఇంత అందంగా ఉంటే, నీ గొంతు ఇంకెంత తియ్యగా ఉంటుందో కదా ! మరి నాకోసం ఒక్క పాట పాడవా ?" అనడిగిందంట. దానికా కాకి ఎంతో పొంగిపోయి, ఆహా నా అభిమాని ఈ నక్క అనుకుని పాట పాడదామని నోరు తెరిచిందంట. కాకి నోట్లో ఉన్న మాంసపు ముక్క జారి నక్క నోట్లో పడిందంట.

ఇంక ఆ నక్క ముక్కని తీసుకుని తుర్రుమన్నదంట...