"దేనికైనా శ్రద్ధే ముఖ్యం..."

 

 

స్వామి వివేకానంద చదువుకునే రోజుల్లో ఒకసారి జరిగిన సంఘటన... 

 

నరేంద్రుడికి పుస్తకాలు చదవటం అంటే ఎంతో ప్రియం. రోజూ కళాశాల లైబ్రరీ లో నుంచి పుస్తకాలు తీసుకెళ్ళేవాడు. అయితే, రోజూ ఒక కొత్త పుస్తకాన్ని తీసుకెళ్ళి, మరుసటి రోజు దాన్ని ఇచ్చేసి, మళ్ళీ ఒక కొత్త పుస్తకాన్ని తీసుకెళ్ళేవాడు. అక్కడ పని చేసే లైబ్రేరియన్, ఇదంతా గమనించి, ఒక రోజు నరేంద్రుని ఆపేసి, "ఏం బాబు, రోజూ ఒక పుస్తకం తీసుకెళ్తున్నావ్, ఇదేమైనా ఆటగా ఉందా ?, అసలు తీసుకెళ్ళిన ఒక పుస్తకం అయినా పూర్తి చెయ్ ముందు, ఇవాళ కొత్తది ఇవ్వను.. " అన్నాడు. బదులుగా నరేంద్రుడు, "లేదండి, ఈ పుస్తకాన్ని చూసేసాను పూర్తిగానే, నాకు కొత్తది కావాలి, దయచేసి ఇవ్వండి. " అని అడిగాడు. అప్పుడు ఆ లైబ్రేరియన్, "ఓహో..ఆ పుస్తకం పూర్తయిందా?,, సరే.. ఆ పుస్తకం ఇలా ఇవ్వు, నేను అడిగిన దానికి సమాధానం చెప్తే ఇవాళ నీకు వేరే పుస్తకం ఇస్తాను, లేదంటే ఇంక ఇవ్వను మరి.. " అన్నాడు. అప్పుడు నరేంద్రుడు, చిరు మందహాసం తో సరే అన్నాడు. 

ఆ లైబ్రేరియన్ మధ్య మధ్య పేజీలు తిప్పుతూ, నరేంద్రుని కొన్ని ప్రశ్నలు వేసాడు. అసలేమి తడుముకోకుండా అన్నిటికి నరేంద్రుడు టక టకా సమాధానాలు ఇవ్వటమే కాకుండా, అది ఎందుకో అని కూడా చెప్పేసాడు. ఇంక, ఆ లైబ్రేరియన్ కి ఆశ్చర్యమేసింది, అతని సమాధానాలకి ముచ్చటేసి, "బాబు.. ఈ పుస్తకాన్ని నిజంగానే నువ్వు పూర్తి చేసావ్, కానీ, రోజూ అన్నిటినీ కూడా ఇలాగే పూర్తి చేస్తున్నావా? " అనడిగాడు. "అవును చేస్తున్నాను, సందేహం ఉంటే మీరు అందులోంచి కూడా అడగవచ్చు.." అని చెప్పాడు నరేంద్రుడు విశ్వాసంగా. "ఇదంతా ఎలా సాధ్యం ?.. ఒక రోజులో ఒక పుస్తకం పూర్తి చేయటం మామూలు విషయం కాదు, కానీ, ఇది నీకెలా సాధ్యం అయింది?"  అనడిగాడు ఆ లైబ్రేరియన్. దానికి నరేంద్రుడు, "పుస్తకాన్ని అందరూ చదువుతారు, నేను చదవను, ప్రతి అక్షరాన్ని లోతుగా చూస్తాను.. ధ్యాస అంతా అందులో ఉన్నపుడు, వేరే ఆలోచన ఏదీ లేనప్పుడు, మనం చూసే ప్రతి అక్షరం సూటిగా మనల్ని తాకి, మనలోనే ఉండిపోతుంది.. పుస్తకం ఒకటనే కాదు, చేసే ఏ పనైనా శ్రద్ధ ఉన్నపుడు, ఆటకం ఉన్నా అది కంటకం కాదు.. దేనికైనా శ్రద్ధే ముఖ్యం..." అని చెప్పి కొత్త పుస్తకాన్ని తీసుకుని వెళ్ళిపోయాడు. ఒక కొత్త అనుభవం ఆనందమై, ఇతని గొప్పతనం అతని విశ్వాసంలోనే ఉంది అనుకుని, వెళ్తూ ఉన్న కాంతి కిరణాన్ని అలా చూస్తూ ఉండిపోయాడు లైబ్రేరియన్. అప్పటినుంచి, కొత్త పుస్తకాలు ఇవ్వటమే కాదు, ప్రత్యేకించి కొన్ని పుస్తకాలను నరేంద్రుని కోసం తెప్పించేవాడు కూడా.

"ఫ్రెండ్స్... వివేకానందుడు అంత గొప్ప వాడు అయ్యాడు అంటే, అది ఆయన జీవించిన విధానం, ఆయన అనుసరించిన మార్గం, ఉపదేశించిన ఆదర్శం.. ఆయన జీవితంలోని విశేషం, మనకు ఎంతో స్ఫూర్తి దాయకం...!"